Pas një sëmundjeje të shkurtër, në moshën 61-vjeçare në Shkup ka vdekur Ljupço Jakimoski, ish-drejtor i Radio Televizionit të Maqedonisë dhe ish-drejtor i agjencisë së lajmeve MIA.
Jakimoski u lind në vitin 1961 në fshatin Velestovë të Ohrit. Ka diplomuar në Fakultetin Filologjik në Shkup – grupi Historia e letërsisë së popujve të RFSJ-së, përcjell INA.
Dy herë u zgjodh deputet nga radhët e VMRO-DPMNE-së, në përbërjen e parë parlamentare, e më pas në vitin 1998. Po në të njëjtin vit u zgjodh drejtor i përgjithshëm i Radiotelevizionit të Maqedonisë, detyrë të cilën e mbajti deri 2002.
Në vitin 2006 u zgjodh drejtor dhe kryeredaktor i MIA-së, pozitë të cilën e mbajti për 11 vjet, deri në vitin 2017.
Ljupço Jakimoski do të varroset të mërkurën më 8 mars në vendlindjen e tij Velestovë. (INA)
