Përfshirja e bullgarëve në Kushtetutën e Maqedonisë është tema kryesore për të cilën do të diskutojnë më 8 qershor kryeministri Dimitar Kovaçevski dhe lideri i VMRO-DPMNE-së Hristijan Mickoski.
Takimi i lidershipit do të mbahet në Klubin e deputetëve në Shkup.
Ndryshimet kushtetuese janë të nevojshme për të vazhduar integrimin evropian të Maqedonisë së Veriut. Mirëpo, për ndryshimin e Kushtetutës nevojitet një shumicë prej dy të tretash në Parlamentin prej 120 anëtarësh dhe për momentin shumica nuk i ka votat e nevojshme, sepse partia më e madhe opozitare VMRO-DPMNE kundërshton ndryshimet e Kushtetutës.
Mickoski në prag të takimit në profilin e tij zyrtar në Facebook ka shkruar se mbajtja e një takimi lidershipi do të kishte kuptim nëse prej tij do të dilte një përfundim konkret. (INA)
