Sipas statistikave të fundit, inflacioni vijon të rrisë çmimet, veçanërisht të ushqimeve, gjë që e ndërlikon edhe më shumë jetën e përditshme të familjeve. Në korrik, kostoja e jetesës u rrit me 3% me bazë vjetore, ndërsa çmimet me pakicë u rritën me 3.9%.
Kjo tendencë e rritjes së çmimeve, e cila vihet re edhe në baza mujore me inflacion prej 0.7% dhe rritje të çmimeve me pakicë me 1.5%, shkakton shqetësim tek qytetarët të cilët shprehin ndjenjën e pasigurisë për shkak të stagnimit të pagave.
Ekspertët paralajmërojnë se kjo situatë mund të rezultojë në një eksod të fuqisë punëtore, veçanërisht nëse pagat nuk fillojnë të përshtaten me rritjen e kostove të jetesës.
“Për të mbajtur fuqinë punëtore dhe për të shmangur emigrimin e saj në kërkim të kushteve më të mira, është thelbësore që pagat në sektorin publik dhe privat të fillojnë të rriten. Kjo jo vetëm do të ndihmojë në parandalimin e eksodit, por do të kontribuojë edhe në përmirësimin e stabilitetit social dhe rritjes ekonomike”, komentojnë ekonomistët.
Në këtë situatë, shtrohet pyetja, cila është pika përfundimtare e qëndresës së popullit maqedonas pa rritje të pagës për të cilën punon?
Qytetarët po përballen gjithnjë e më shumë me dilemën nëse duhet të shpenzojnë më shumë për nevojat elementare apo të kursejnë, gjë që komplikon edhe më shumë vendimet e tyre financiare.
Sipas llogaritjeve, një e treta e parave ose 22.008 denarë shkojnë për ushqim dhe pije, pastaj për shpenzime të përgjithshme me 6.014 denarë, arsim 7.022, veshmbathje dhe këpucë 4.979 denarë, ndërsa më së paku para ndahen për artikullin shëndetësor 1.135. denarë.
Pritet që Qeveria dhe sektori privat së shpejti të marrin masa për përmirësimin e standardit të pagave në vend, për të garantuar siguri ekonomike për qytetarët dhe për të shmangur krizën e mundshme të fuqisë punëtore.
