Sot është ndarë nga jeta, në moshën 102-vjeçare, veprimtari i denjë i çështjes kombëtare, atdhetari i mirënjohur, i burgosuri politik dhe piloti i parë shqiptar i Aviacionit ushtarak, Rexhep Gali Balidemaj, nga krahina e Plavë-Gucisë.
Ai u lind më 19 dhjetor 1922 në fshatin Martinaj të Gucisë dhe gjatë gjithë jetës u dallua për qëndresën e tij të palëkundur ndaj represionit jugosllav. Për shkak të veprimtarisë së tij atdhetare, Balidemaj përjetoi gjashtë dënime të rënda, duke kaluar gjithsej 13 burgje famëkeqe, përfshirë Goli Otokun, Kotorin, ishullin Gërgur, si dhe burgjet e Prishtinës, Gjilanit e Gjurakovcit.
Në vitin 1946, ai u dërgua në Kiev të Bashkimit Sovjetik, ku u trajnuar si pilot ushtarak dhe u bë piloti i parë shqiptar i aviacionit ushtarak. Pas dy vitesh, u rikthye në Zagreb të Kroacisë për të vazhduar detyrën e tij.
Pas përfundimit të dënimeve të rënda në ish-Jugosllavi, Balidemaj vazhdoi aktivitetet për çështjen kombëtare dhe Kosovën. Vitet e fundit të jetës i kaloi në Shtetet e Bashkuara të Amerikës.
Jeta dhe sakrifica e Rexhep Gali Balidemajt mbeten dëshmi e pathyeshme e përkushtimit të tij për kombin shqiptar. Biografia e tij u dokumentua në veprën “Qendra: Gjenocidi në Kosovë – Plagë e hapur”.(INA)
