Plani 6 miliardë euro i BE-së, në qendër të vëmendjes – Shqipëria, Kosova, Mali i Zi, Maqedonia e Veriut dhe të tjerët, në tryezë me Brukselin
Në Shkup po mban punimet Samiti i Liderëve të Bashkimit Evropian dhe Ballkanit Perëndimor, i cili mblodhi liderët e rajonit për të diskutuar rreth Planit për Rritje të BE-së dhe për të riafirmuar përkushtimin e përbashkët ndaj reformave dhe anëtarësimit në BE.
Samiti, i cili mbahet në një moment kyç për të ardhmen evropiane të rajonit, synon të vlerësojë progresin individual dhe të përbashkët të vendeve të Ballkanit Perëndimor drejt BE-së, si dhe të përcaktojë hapat praktikë për implementimin e Planit për Rritje të prezantuar nga Brukseli në vitin 2024.
Në samit marrin pjesë kryeministrat e Shqipërisë, Kosovës, Malit të Zi, përfaqësues të lartë nga Bosnja e Hercegovina dhe Serbia, si dhe Komisionerja për Zgjerim e BE-së, Marta Kos.
Fjalime, panele dhe takime bilaterale në Shkup
Mikpritës i samitit është kryeministri i Maqedonisë së Veriut, Hristijan Mickoski, i cili së bashku me Komisioneren Kos hapi panelin e parë të diskutimeve. Në fokus: mënyrat konkrete për të zbatuar Planin për Rritje 2024–2027.
Pas fjalimeve kryesore, Kos dhe Mickoski mbajtën një konferencë të përbashkët për shtyp. Paneli i dytë i samitit pritet të trajtojë mbështetjen financiare dhe teknike që do të marrin vendet e rajonit për zbatimin e reformave.
Mesazhe të qarta: Reforma – kusht për integrim
Në një takim të zhvilluar një ditë më parë me Kos, kryeministri Mickoski theksoi se Maqedonia e Veriut është e përkushtuar për “integrim të denjë në BE përmes reformave thelbësore në drejtësi, ekonomi dhe digjitalizim”.
Kos, nga ana e saj, vlerësoi axhendën reformuese të qeverisë dhe riafirmoi mbështetjen e Komisionit Evropian për përparimin e rajonit drejt anëtarësimit në BE.
Opozita kritikon: “Qeveria po humb fonde” – qeveria mohon
Kreu i opozitës nga LSDM, Venkо Filipçe, kritikoi qeverinë se nuk ka përmbushur kriteret për të përfituar nga fondet e BE-së. Ai tha se 43 milionë euro nga Plani për Rritje mbetën të pashfrytëzuara për shkak të mungesës së projekteve dhe reformave.
Qeveria e mohoi këtë dhe ministri për Çështje Evropiane, Orhan Murtezani, deklaroi se fondet nuk janë në rrezik nëse reformat përmbushen deri në qershor 2026.
Çfarë është Plani për Rritje i BE-së për Ballkanin Perëndimor?
Plani për Rritje është një iniciativë 6 miliardë euro e Bashkimit Evropian për të përshpejtuar zhvillimin ekonomik dhe reformat në vendet e Ballkanit Perëndimor. Ai përfshin grante dhe kredi të buta për vendet që zbatojnë me sukses reformat në drejtësi, ekonomi, administratë dhe digjitalizim.
Për Maqedoninë e Veriut janë alokuar deri në 750 milionë euro, me kusht zbatimin e axhendës reformuese të dakorduar me Brukselin.(INA)
