Nënkryetari i VMRO-DPMNE, Aleksandar Nikollovski sërish ka folur për rastin e deputetit Kastriot Rexhepi, i cili humbi çdo gjurmë ditën e nëntorit kur po votohej votëbesimi i Qeverisë Zaev.
Nikollovski mbrëmë në TV Shenja ka shfaqur dyshime se deputeti Rexhepi i shkarkuar nga Lëvizja BESA ka mundur të jetë i strehuar dhe mbrojtur në vilën e kryeministrit apo në ambientet e kabinetit kryeministror.
Ai për këtë ka akuzuar dhe ka pyetur ish-kryeministrin Zoran Zaev, se përse ka keqpërdorur institucionet shtetërore.
“Ish-kryeministri Zoran Zaev a i ka keqpërdorur objektet e shtetit, në të cilat po e ruanin Kastriot Rexhepin. Objektet shtetërore, para se gjithash vila kryeministrore dhe ambientetet e zyrës së kryeministrit a janë keqpërdorur për tu strehuar dhe mbrojtur Rexhepi”, deklaroi Nikollovski.
Ai shtoi se nëse nuk është kjo e vërtetë, atëherë le të dalin ta demantojnë. Nikollovski ka shtuar se me ndërrimin e pushtetit, gjithçka do të dal në sipërfaqe. (INA)
