Ministri i ekonomisë dhe punës, Besar Durmishi, iu kërcënua prodhuesve, distributorëve dhe tregtarëve që të mos rritin çmimet e produkteve themelore ushqimore që nuk janë pjesë e “Shportës së Vitit të Ri”. Ai në brifingun e fundvitit me gazetarë, tha se në tavolinë e ka vendimin për ngrirjen e çmimeve të këtyre produkteve.
“Nuk mund t’i sanksionojmë për shkak të mosrespektimit të “Shportës së Vitit të Ri”. Nëse tregtarët, distributorët dhe prodhuesit i rritin çmimet e produkteve themelore ushqimore që nuk janë pjesë e kësaj mase, nëse duhet edhe natën do ta nënshkruaj vendimin për çmimet dhe Qeveria do t’i ngrij”, tha Besar Durmishi – ministër i Ekonomisë dhe Punës.
Ministri pohon se çdo ditë inspektorët nga Inspektorati i tregut janë në terren dhe ndjekin nëse ka rritje të çmimeve. Durmishi paralajmëroi se edhe pas harmonizimit të rregullt të pagës minimale, që do të kryhet në mars të vitit 2025, paga minimale me shumë gjasa do të jetë 24.400 denarë.
“Shuma totale e pagës minimale që do të vlejë nga marsi i vitit të ardhshëm do të dihet pasi të merren të dhënat për inflacion dhe pagën mesatare në 2024 pas çka do të harmonizohet paga minimale”, u shpreh Besar Durmishi – ministër i Ekonomisë dhe Punës.
