Zëvendëskryeministrja e Shqipërisë dhe njëherësh ministrja e Infrastrukturës dhe Energjisë, Belinda Balluku, ka prezantuar Liburn Aliun si drejtor të ri të Portit të Durrësit, i cili do të zëvendësojë në këtë detyrë Kreshnik Bajraktarin, raporton INA
Gjatë prezantimit, Balluku tha se e ka njohur Aliun që nga koha kur ai mbante postin e ministrit të Mjedisit, Planifikimit Hapësinor dhe Infrastrukturës në Kosovë, duke e vlerësuar si një profesionist me përvojë dhe përkushtim në fushën e infrastrukturës.
Në fjalën e tij, Aliu u shpreh mirënjohës për besimin e dhënë nga Qeveria e Shqipërisë dhe zv.kryeministrja Balluku, duke e cilësuar këtë si një sfidë të re të rëndësishme.
“Jam shumë i nderuar që jam sot këtu dhe jam i nderuar nga qeveria e Republikës së Shqipërisë, nga zv/kryeministrja Balluku, për një detyrë që më është besuar dhe që është mjaft sfiduese. Porti i Durrësit nuk është vetëm port i Republikës së Shqipërisë, por port i gjithë shqiptarëve dhe i gjithë rajonit,” – tha Aliu.
Liburn Aliu ka mbajtur postin e ministrit të Mjedisit, Planifikimit Hapësinor dhe Infrastrukturës në Qeverinë e Kosovës nga viti 2021 deri në gusht 2025, kur dha dorëheqje – një ditë pas votimit të Dimal Bashës si kryetar i Kuvendit.
Në një reagim në rrjetet sociale në atë kohë, Aliu kishte theksuar se dorëheqja e tij lidhej pikërisht me këtë zhvillim politik, ndërsa më herët ishte raportuar për ftohje të marrëdhënieve mes tij dhe kryeministrit Albin Kurti.(INA)
