Të 14 policët e dyshuar për tragjedinë e Koçanit janë në arrest shtëpiak. Mes tyre janë shtatë policët, të cilëve këto ditë u skadon paraburgimi 30-ditor, përcjell TV21. Përveç kësaj, atyre u janë konfiskuar pasaportat, u ndalohet komunikimi dhe duhet të paraqiten herë pas here te një gjykatës.
Te gjykatësi i procedurës paraprake është edhe polici i cili dje u shpall në kërkim, por sipas informacioneve ai vetë është paraqitur në polici. Përndryshe, një pjesë e policëve të dyshuar nga Koçani dhe Shtipi tashmë janë në pension, por për ata që janë ende në shërbim është shqiptuar masë – ndalesë për ushtrimin e profesionit, njoftoi Prokuroria për krim të organizuar dhe korrupsion.
Të gjithë dyshohen për “krime të rënda kundër sigurisë publike”. Sipas dyshimeve, me dokumente të rrejshme dhe të dhëna të rrejshme, që në fillim të funksionimit të Puls, ata kanë dhënë pëlqim që diskoteka të marrë leje funksionimi, edhe pse kushtet për këtë nuk janë plotësuar fare. Prokuroria kompetente bëri të ditur se janë duke vazhduar me veprimet parahetimore me qëllim të zbulimit të personave të rinj të përfshirë në këtë rast.
