Pas hetimeve, Prokuroria Themelore Publike e Kavadarit ka ngritur aktakuzë për vrasje ndaj një personi, përcjell TV21. Sipas njoftimit të Prokurorisë, i akuzuari, 43 vjeç, më 27 korrik të këtij viti, nga motivi i përfitimit material, i ka marrë jetën vëllait të tij më të ri.
“Në ditëlindjen e viktimës, të dy vëllezërit filluan të grindeshin, sepse i akuzuari besonte se vëllai i tij donte të merrte të gjithë pronën. I nxitur nga ndjenja e zemërimit dhe urrejtjes, ai e goditi të vëllain me pjesën e butë metalike të një çekani për ndërtimtari (teshlicë). Kur viktima ra, i akuzuari e goditi edhe dy herë, duke i shkaktuar plagë të menjëhershme fatale. Më pas, ai u largua nga vendi i ngjarjes, por ditën tjetër u kthye në shtëpinë e viktimës dhe trupin e zhvendosi në banjë. Në ditët pasuese, ai vazhdoi të kthehej për të fshehur krimin – fshiu gjakun nga dyshemeja dhe objektet, e çoi trupin në bodrum, e mbuloi me dhe, po ashtu vendosi sipër një tabelë prej druri dhe objekte të tjera”, njofton Prokuroria e RMV-së.
Sipas Prokurorisë, në periudhën nga 30 korriku deri më 5 gusht, kur trupi u zbulua, i akuzuari në disa raste kishte tërhequr para me kartën bankare të viktimës. Me aktakuzën e dorëzuar, prokurori ka kërkuar vazhdimin e masës së paraburgimit për të akuzuarin.
