Njësia e re e formuar brenda Prokurorisë Publikë për ndjekjen e krimit serioz dhe korrupsionit, një nga hetimet e para që ka hapur është kundër ish-drejtorit të Agjencisë për Investime të Huaja, Bekim Emini, i cili në këtë postë ishte emëruar në vitin 2021 si kuadër i Alternativës, raporton Klan-M. Emini dyshohet për keqpërdorimin e detyrës dhe se ka dëmtuar buxhetin e shtetit me veprimet e tij. Ka nënshkruar marrëveshje në katër sy në vend se të ndjek procedurën ligjore përmes shpalljes publike për angazhim të kompanive për nevojat e Agjencisë për Investime të Huaja.
Pjesëtarë të MPB nga njësiti për krim ekonomik janë duke grumbulluar dokumentacionin e duhur të periudhës derisa me Agjencinë ka udhëhequr Bekim Emini. Nga MPB për Klan Maqedoni thanë se derisa zhvillohet hetimi për dikë nuk mund të japin hollësi.
Emini ndryshe është edhe pretendenti kryesor që të marrë detyrën e Avokatit të Shtetit, pasi ka konkurruar në konkursin e hapur për të parin e këtij institucioni, ndërsa përzgjedhjen duhet ta bëj qeveria gjatë javës së ardhshme. Ndaj Bekim Eminit, sipas dokumentacionit të siguruar nga Klan Maqedoni, padi penale dhe parashtesa janë lëshuar jo vetëm në Prokurorinë për krime serioze dhe të ndërlikuara, por edhe deri tek Policia Financiare dhe Komisioni për Antikorrupsion. Bekim Emini ndryshe është edhe kryetari aktual i Degës së Alternativës në Gostivar.
