Një person ka vdekur si pasojë e një aksidenti trafiku që ka ndodhur sot rreth orës 16:10 në autostradën “Ibrahim Rugova”, drejtimi Prishtinë-Prizren, në Vërmicë.
Si pasojë e aksidentit lëndime trupore kanë pësuar dy persona të tjerë. Të njëjti janë dërguar për trajtim mjekësor në Spitalin e Prizrenit.
“Njësitet kompetente policore iu kanë përgjigjur rastit, përderisa ekipi mjekësor ka konstatuar se një person ka humbur jetën. Dy persona të tjerë po ashtu si pasojë e aksidentit kanë pësuar lëndime trupore dhe janë dërguar për trajtim mjekësor në Prizren. Në vendin e ngjarjes kanë dalë Njësiti i hetimeve, zjarrfikësit si dhe autoambulanca, për rastin gjithashtu është njoftuar edhe Prokurori e Mjekësia Ligjore”- ka thënë Hoxha.
Sipas tij, hetime aktive janë duke u kryer për shkaqet që kanë dërguar deri tek aksidenti i rëndë dhe me pasoja tragjike.
Policia e Kosovës u ka bërë thirrje drejtuesve të automjeteve që të jenë të kujdesshëm, të respektojnë shenjat dhe kufizimet e shpejtësisë, posaçërisht në kohë të ndryshimeve atmosferike dhe reshjeve për të shmangur raste të tilla të aksidenteve me pasoja fatale.
