Lirim Begzati
Për me punuar në Zvicër, shtetasit e huaj që jetojnë në afërsi të territorit zviceran, nuk janë të detyruar të jenë bartës të një pasaporte të ndonjë shteti evropian.
Nëse plotësohen disa kushte, mjafton me pasur vetëm një leje qëndrimi dhe një vendbanim në afërsi të disa zonave kufitare që e ndajnë Zvicrën nga disa shtete fqinje (Itali, Francë, Gjermani dhe Austri).
Një leje pune mund t’iu akordohet pra personave që banojnë në zonat afër kufijve shtetërorë të Zvicrës dhe që gjejnë një punë në zonat e konsideruara gjithashtu kufitare brenda territorit zviceran.
Ekziston një rregullore mbi këtë çështje e cila e përcakton hapësirën gjeografike deri ku shtrihet një zonë kufitare, e cila kuptohet se është e kufizuar.
Aplikohen rregulla të shumta për punëtorët “kufitarë”, dhe ata kanë të bëjnë posaçërisht me sigurimet, tatimet, vendbanimin, etj. Për shembull, ata duhet të kthehen së paku një herë në javë në vendbanimin e tyre kryesor në shtetin fqinjë prej nga vijnë.
Rregullat e aplikuara për zonat kufitare vlejnë edhe për mundësitë e hapjes së një biznesi.
Kështu që, po të njëjtit persona, kanë mundësi të hapin një biznes në Zvicër, edhe atë sipas kritereve të aplikuara për shtetasit e huaj (me origjinë nga ndonjë shtet jashtë BE) që jetojnë afër zonave kufitare.
Rregullat e sipërpërmendura vlejnë për personat që janë bartës të një leje stabile të qëndrimit të lëshuar nga ndonjëra nga shtetet fqinje të Zvicrës dhe nëse jetojnë në zonat kufitare prej së paku disa muajsh.
