Nga Ministria e Punëve të Brendshme njoftojnë se sot me ndihmën e ekipit special “Tigrat” dhe Ekipit të Helikopterëve pranë MPB-së, në fshatin Galiçnik në Komunën e Mavrovë- Rostushës është shpëtuar një person i sëmurë dhe i pafuqishëm, përcjell TV21. Nga MPB theksojnë se pas evakuimit, me ndihmën e helikopterit personi në fjalë është transferuar në spitalin “8 shtatori” në Shkup.
“Ekipi “Tigrat” së bashku me kolegët e Njësisë së Helikopterëve sot (09.02.2022) në periudhën nga ora 07:00 deri në ora 10:00 kanë evakuuar një banor të fshatit Galiçnik, për shkak të borës në rrugët për në fshat, ekipi i Tigrave është detyruar të zbresin në lokacionin në Galiçnik, duke përdorur pajisje speciale për uljen dhe ngritjen nga helikopteri. Personi është përgatitur për transport nga ana e zyrtarëve policorë, është futur në helikopter dhe është transportuar në SPQ “8 shtatori” në Shkup, ku është dorëzuar për ndihmë mjekësore”, thuhet mes tjerash në njoftimin e MPB-së.