Përfundon me fitoren 3-1 të Napolit superfida e kësaj jave në Serie A. Kampionët e Italisë mposhtin 3-1 në “Maradona” një Inter me shumë ndryshime në formacion dhe pas këtij suksesi skuadra e Spallettit arrin që të mposhtë të 19-të kundërshtarët që ka patur këtë sezon në kampionat.
Vendasit nisin më mirë takimin dhe i afrohen golit të avantazhit me Anguissa. Interi mbetet me 10 lojtarë në fushë, pasi pak para përfundimit të pjesës së parë Gagliardini ndëshkohet me karton të kuq.
Pjesa e dytë është shumë e bukur, ka gola dhe emocione. Në tentativën e tretë Anguissa arrin që të dërgojë topin në rrjetë dhe të zhbllokojë sfidën. Por zikaltërit reagojnë dhe 8 minuta nga përfundimi i kohës së rregullt barazojnë shifrat me Lukakun.
Napoli reagon menjëherë me Di Lorenzon, që kalon sërish në avantazh vendasit, ndërsa Gaetano në kohën shtesë shënon golin që vulos fitoren 3-1 të skuadrës së Spallettit. Interi mbetet në vendin e tretë në renditje, por kjo disfatë komprometon pozitat në zonën Champions.