Google është nën hetim pas një vendimi gjyqësor të vitit të kaluar që konstatoi se kompania ka një monopol mbi kërkimin në internet, por e ardhmja e ofertës së saj të gjerë të shërbimeve digjitale mbetet ende e pasigurt.
Muajin e kaluar, Departamenti i Drejtësisë sugjeroi se Google mund të detyrohet të shesë shfletuesin Chrome. Nëse gjiganti teknologjik do ta marrë me të vërtetë këtë vendim, tashmë ekziston të paktën një blerës i interesuar.
Sipas Bloomberg, Nik Tarli, shefi i ChatGPT-së, foli sot gjatë një seance dëgjimore lidhur me situatën e monopolizimit dhe u pyet nëse OpenAI do të ishte i interesuar për të marrë Chrome-in.
“Po, do të ishim – ashtu si edhe shumë të tjerë”, u përgjigj Tarli.
Aktualisht, përdoruesit mund ta përdorin asistentin AI të ChatGPT-së përmes një shtojce në Chrome, por Tarli tha se do të mund të kishte integrime shumë më të thella nëse OpenAI do të ishte pronar i shfletuesit. Nën pronësinë hipotetike të OpenAI-së, Chrome mund t’u ofrojë përdoruesve një përvojë të re, që nga fillimi të jetë e bazuar në inteligjencë artificiale.
Chrome nuk është i vetmi shërbim që Google mund të humbasë. Një gjyqtar tjetër, më herët këtë muaj, arriti në përfundimin se Google ka vepruar në mënyrë monopoliste në fushën e reklamimit në internet.
Nuk është për t’u habitur që çdo kompani e madhe teknologjike do të ishte e interesuar për të marrë në zotërim një nga shumë shërbimet e njohura që Google ka zhvilluar gjatë viteve. Pyetja kryesore është se cila prej tyre, nëse e realizon blerjen, mund të shkaktojë një monopol të ri?
Për momentin, Departamenti i Drejtësisë po i lejon Google-it të vazhdojë investimet në inteligjencë artificiale, pavarësisht diskutimeve për ndarjen e kompanisë, por kalimi i pronësisë së shfletuesit Chrome tek OpenAI mund të ngjallë shqetësime të reja.
Meqë proceset ligjore shpesh zgjasin, me shumë gjasë do të duhet kohë para se të mësojmë rezultatet përfundimtare të vendimeve të fundit kundër kompanisë Google.
