Ministri i jashtëm dhe anëtari i kryesisë së BDI-së, Bujar Osmani në tubimin mbrëmë në Shipkovicë të Tetovës kreun e BDI-së, Ali Ahmeti e ka krahasuar me presidentin ukrainas Zelenski.
“Shipkovicën e dua sepse këtu e kam takuar së pari herë Ali Ahmetin, natyrisht me një veshje më ndryshe, por mu rikujtua ajo skenë këtu në një shtëpi afër dhe para disa ditëve në Kiev të Ukrainës ku takova presidentin Zelenski, jo për shkak se e veshura ishte e ngjajshme, por për shkak se te dy atëherë kur e takova kryetarin Ahmeti dhe tash kur e takova presidentin Zelenski pash në sytë e tyre një dashuri për popullin e vet” u shpreh Osmani nga Shipkovica, përcjell INA.
Ai ka përmendur edhe kryesimin me OSBE, ku dje ka qëndruar në zyrën e OSBE në Tetovë.
“Shqiptarët dikur në zyrat e OSBE-së shkonin vetëm për të paraqitur dhunën që ushtrohej ndaj tyre, ndonjë padrejtësi policore apo diçka të ngjajshme, ndërsa sot gjërat kanë ndryshuar, unë aty hyra si i pari i OSBE-së, si kryesuesi i OSBE-së. Pra, a e shihni së sa kanë ndryshuar dhe përparuar shqiptarët ndër vite? Shikoni ku kemi qenë dhe ku jemi sot, falë politikave të liderit Ali Ahmeti”, deklaroi Osmani. (INA)
