Ish Ministri i Jashtëm dhe përfaqësues i BDI-së, Bujar Osmani, ka reaguar ashpër ndaj deklaratave të fundit të Kryeministrit Hristijan Mickoski, të cilat i ka cilësuar si skandaloze dhe të rrezikshme për kohezionin ndëretnik dhe stabilitetin e vendit.
“Si asnjëherë më parë, kemi një kryeministër që në vend se të punojë për forcimin e unitetit të brendshëm të shtetit, me këmbëngulje po i minon themelet e stabilitetit tonë të brendshëm,” deklaroi Osmani.
Ai shtoi se kryeministri nuk po e kultivon bashkëjetesën, por përkundrazi, “po investon me vetëdije në nxitjen e urrejtjes dhe intolerancës ndëretnike.”
“E pranoj që jemi kundërshtarë politikë dhe kemi koncepte të ndryshme për zhvillimin e shtetit. E pranoj edhe se nuk mund të pajtohemi për të ashtuquajturat ‘garanci’ për vazhdimin e rrugës evropiane, e cila, për të qenë të sinqertë, nuk po ecën mirë në asnjë drejtim. Por, Kryeministër, ju po e kaloni vijën themelore të korrektësisë politike – dhe për më tepër, pa asnjë arsye,” theksoi ai.
Osmani e akuzoi Mickoskin për gjuhë fyese, përçmuese dhe kërcënuese, duke përmendur edhe përdorimin e simbolikës religjioze në dëm të tolerancës ndërfetare:
“Përdorni aluzione me sakrificën e Krishtit – për gozhdimin në duar dhe këmbë – për të shtuar intolerancën jo vetëm etnike, por tani edhe fetare.”
Ai theksoi se retorika populiste e Mickoskit po dëmton rëndë trupin e përbashkët shoqëror të shtetit dhe përpjekjet për të krijuar një konsensus ndëretnik dhe shtetëror.
“Ju mallkoni dhe betoheni në një mbrojtje të imagjinuar të gjuhës maqedonase, e cila, para jush, është e mbrojtur dhe e konfirmuar nga 27 vendet anëtare të Bashkimit Evropian, përmes Kornizës negociuese. Ndërkohë, në vend, me gjithë forcën tuaj (dhe me mbështetjen e papërshtatshme partiake të Gjykatës Kushtetuese), bëni gjithçka për ta përçmuar gjuhën shqipe dhe qytetarin shqiptar,” tha Osmani.
Në përmbyllje, ai dërgoi një mesazh të drejtpërdrejtë:
“Ti mund të fyesh, të kërcënosh, të mallkosh – por Hristijan, ke një mungesë themelore në të kuptuarit e realitetit: ne shqiptarët nuk jemi mysafirë në këtë shtet, por jemi të zotët e shtëpisë. Ky është shtëpia jonë, këtu duam të ndërtojmë të ardhmen tonë dhe të fëmijëve tanë, dhe nuk kemi ndërmend të largohemi nga këtu. (INA)
