Presidentja e Shtetit, Vjosa Osmani, ka thënë se veprimet e Policisë së Kosovës në veri nuk ishin akte dhune.
Sipas saj, aksioni i tyre ishte legjitim, dhe në përputhje me detyrat e tyre kushtetuese, shkruan gazeta online Reporteri.net.
Ky reagim i Presidentes Osmani vjen pas deklaratave të Sekretarit amerikan të Shtetit, Antony Blinken, dhe Ambasadorit amerikan Jeffrey Hovenier, ku thanë se fajtor për tensionet në veri është Qeveria e Kosovës.
“Sovraniteti dhe integriteti territorial i Republikës së Kosovës është i pacenueshëm, i patjetërsueshëm dhe i pandashëm, ndaj mbrohet me të gjitha mjetet e përcaktuara me Kushtetutë dhe me ligj. (Neni 2 i Kushtetutës)”, shkroi Osmani.
“Veprimet e Policisë së Kosovës ndaj strukturave ilegale e bandave kriminale të Vuçiqit janë legjitime, në realizim të detyrave të tyre kushtetuese dhe në mbrojtje të të gjithë qytetarëve, pa dallim”, tha tutje. /Reporteri.net/.
Postimi i plotë:
Sovraniteti dhe integriteti territorial i Republikës së Kosovës është i pacenueshëm, i patjetërsueshëm dhe i pandashëm, ndaj mbrohet me të gjitha mjetet e përcaktuara me Kushtetutë dhe me ligj. (Neni 2 i Kushtetutës)
Veprimet e Policisë së Kosovës ndaj strukturave ilegale e bandave kriminale të Vuçiqit janë legjitime, në realizim të detyrave të tyre kushtetuese dhe në mbrojtje të të gjithë qytetarëve, pa dallim.
Qëndrueshmëria, jetëgjatësia dhe suksesi i këtyre veprimeve varen njëkohësisht edhe nga koordinimi me aleatët që ishin dhe mbeten garantues të sovranitetit dhe pavarësisë sonë.
Bashkë, jemi gjithnjë më të fortë!
