“Qeveria e mandatarit Dimitar Kovaçevski është qeveri e kushtëzuar, edhe nga më i vogli që është pjesë e saj, pasi që për mbijetesën e saj në plan të parë janë interesat e grupimeve të ndryshme brenda këtij koalicioni, se sa fryma apo misioni që duhet të ketë”, thekson gazetari Naser Pajaziti në emisionin “Ballkan” mbrëmë në ABC News, lidhur me zhvillimet në Maqedoninë e Veriut në prag të votimit të Qeverisë së re.
Sipas tij, Kovaçevski do të zgjidhet të dielën kryeministër, por ai do të vazhdoj të jetë nën hijen e Zaevit.
“Qeveria dhe Kovaçevski do vazhdoj të jetë në prapaskenë e ndjekur nga hija e Zaevit dhe grupeve të interesit, duke pasur parasysh faktin se brenda kabinetit ministror kemi dy ministra si Spasovski dhe Nikollovski që janë pjesë e trinomit të Zaevit”, thekson Pajaziti.
Ai vlerëson se shqiptarët në këtë Qeveri për herë të parë kanë një numër rekord të ministrave, pas përfshirjes së Alternativës, por do të shihet se a do të kemi të bëjmë më shumë me sasi se sa me cilësi dhe arritje të objektivave që janë në interes të qytetarit shqiptar, dhe jo interesave partiake dhe politike.(INA)
