Kryetari i Komunës së Tetovës Bilall Kasami, është pyetur në lidhje me kërkesën e Iniciativës Zero, të cilët kërkuan që hapësira ku ndodhej Spitali Modular të shndërrohet në park memorial, ndërsa tha se do të përkrahin çdo iniciativë për viktimat në zjarrin tragjik në Spitalin Modular.
“Gjithçka që ka të bëjë me tragjedinë në Spitalin Modular Komuna e Tetovës do ta përkrahë. E kemi theksuar edhe në të kaluarën, por e përsërisim edhe tani – kërkojmë nga institucionet e drejtësisë që të zbardh këtë rast dhe familjarët e viktimave të marrin drejtësinë e merituar. Ne si pushtet lokal jemi të gatshëm të përkrahim çdo iniciativë që së paku familjarët e viktimave të Spitalit Modular të kenë një rehati shpirtërore”, tha Kasami mes tjerash.
Ndryshe, ditë më parë Iniciativa Zero dorëzoi kërkesë në Komunën e Tetovës me të cilën propozoi që hapësira ku ishte i vendosur spitali modular, të shndërrohet në park përkujtimor për viktimat.
“Është detyrë e tyre që të mos neglizhohet tragjedia që ka ndodhur dhe të mos shndërrohet në hapësirë ku vendosen veturat e vjetra, që është momentalitsht te parkingu i Spitalit të Tetovës ku ka ndodhur tragjedi”, tha Hodai.
