Me 104 vota pro, tre votw kundër dhe një abstenim, në seancën e 65-të, Kuvendi i Maqedonisë së Veriut miratoi nevojën e miratimit të një Deklarate që dënon sulmet ushtarake që kërcënojnë integritetin territorial dhe sovranitetin e Ukrainës.
Deklarata është propozuar nga deputetet e Partisë Liberal Demokrate dhe DOM-it, Monika Zajkova dhe Maja Moraçanin.
Por siç merr vesh INA kundër kësaj Deklarate që dënon agresionin rus kanë votuar dy deputetët e partisë “E Majta”: Dimitar Apasiev, Borisllav Krmov si dhe deputeti i Partisë Demokratike të Serbëve, Ivan Stoilkoviq.
E përmbajtur ka votuar deputetja e VMRO-DPMNE-së, Ivanka Vasilevska.
Duke shpjeguar nevojën e miratimit të Deklaratës që dënon sulmet ushtarake në Ukrainë, deputetja e PLD-së, Zajkova, e veshur me ngjyrat e flamurit ukrainas, tha se gjatë historisë, njerëzimi ka qenë dëshmitar i shumë luftërave dhe konflikteve të brendshme, çmimin e të cilave e kanë paguar vetëm të pafajshmit.
Ajo shprehu shpresën se kësaj radhe deputetët do të jenë të bashkuar në miratimin e deklaratës dhe se, siç tha ajo, lufta nuk është metodë për zgjidhjen e mosmarrëveshjeve.
Pasi draft-deklarata të diskutohet në Komisionin e Politikës së Jashtme dhe Komisionin Legjislativ, ajo do t’i kthehet deputetëve për votim.(INA)
