Pasi u bllokua nga banorët për dy ditë, banorët e Pçinjës, Studena Barës dhe Vakv lejuan që kamionët të hyjnë në deponinë e Krastës dhe të vazhdojnë me hedhjen e plehrave. Banorët kanë arritur marrëveshje që të hënën do të ketë takim me kryetarin e komunës Maksim Dimitrievski dhe përfaqësues të popullatës lokale, ku do të marrin pjesë edhe institucionet më të larta.
Banorët e Pçinjës dhe fshatrave përreth kërkojnë zhvendosjen e deponisë, pas zjarrit të madh që po vazhdon prej disa ditësh. Ata reagojnë se deponia po ndot rajonin e tyre dhe kulturat bujqësore që prodhojnë.
Pas bllokadës dyditore të Krastës, Këshilli i Komunës së Kumanovës dje ka mbajtur seancë të jashtëzakonshme. Këshilltarët votuan një konkluzion për formimin e grupeve të punës që do të marrin masa për tejkalimin e problemit, rekomanduan ndalimin e bllokadës por edhe kërkuan që kompania t’i përmbahet udhëzimeve të inspektoratit dhe brenda shtatë ditëve të shuajë plotësisht zjarrin.
