Kryetari i Alternativës opozitare, Afrim Gashi, beson se presidenti Stevo Pendarovski e ka dhënë përgjigjen e pyetjes së tij të para disa ditëve se “a ka kërkuar njeriu i parë i BDI-së, Ali Ahmeti amnisti për ish-kryeministrin Nikolla Gruevski?”
“Në pyetjen tonë të parë publike se “A i ka lutur, deri në qiell, Ali Ahmeti disa nga ndërkombëtarët, gjatë një takimi në Shkup, që ta lejojnë amnistinë e Nikolla Gruevskit?!”, përgjigjen e dha Presidenti Stevo Pendarovski. Faleminderit President për konfirmimin e informacionit!”, tha Afrim Gashi, kryetar i Alternativës.
Në fakt, Presidenti në emisionin “Triling” e pranoi se aktorë të skenës politike i kanë folur për amnistimin e Gruevskit, por pa specifikuar se nga cili bllok vinin këta aktorë.
“Në nivel joformal, disa aktorë politikë më konsultuan për këtë mundësi, se çfarë mendoj, por u thash me vendosmëri se këtë nuk do ta bëja kurrë”, u shpreh presidenti Stevo Pendarovski.
Por më pas, përmes një komunikate me shkrim nga Presidenca qartësuan se propozimet që të shqyrtojë faljen e politikanëve të caktuar ose të mbështesë miratimin e ligjit aktual për amnisti kanë ardhur persona të afërt me opozitën.
“Këto propozime, përmes ndërmjetësve, i janë dërguar presidentit Pendarovski nga strukturat politike dhe të sigurisë që janë të afërta me opozitën aktuale, si dhe nga ish-politikanë”, deklaruan nga Kabineti i Presidentit.
Ky sqarim i presidencës erdhi pas një konference për media të opozitares VMRO-DPMNE të cilët i kërkuan Pendarovskit të tregojë se nga ka ardhur kërkesa për amnistimin e ish-kryeministrit Gruevski.
