Pentagoni njofton se nuk ka më fonde për Ukrainën

ina-online
ina-online

23/01/2024

Sekretari amerikan i Mbrojtjes Lloyd Austin gjatë takimit të aleatëve për të diskutuar ndihmat për Ukrainën më 23 janar, 2024/Departamenti i Mbrojtjes përmes AP.

Për herë të parë që kur Sekretari amerikan i Mbrojtjes Lloyd Austin ngriti grupin ndërkombëtar për të ndihmuar Ukrainën në prill të vitit 2022, Shtetet e Bashkuara po mirëpresin 50 shtetet pjesëmarrëse në takimin mujor të radhës pa buxhet dhe pa mundësinë për të dërguar municion dhe raketat që i duhen Ukrainës për t’iu kundërpërgjigjur sulmit rus.

Ndërkohë që pritet që Kongresi të miratojë buxhetin dhe ndoshta më shumë fonde për luftën e Ukrainës, Shtetet e Bashkuara shpresojnë që aleatët do të vazhdojnë ta plotësojnë boshllëkun e krijuar.

“E nxis këtë grup që të shkojë një hap më tutje për t’i dhënë Ukrainës më shumë sisteme mbrojtëse tokësore dhe raketa mbrojtëse që shpëtojnë jetë”, deklaroi Sekretari Austin në fjalimin e hapjes të mbajtur nga shtëpia, ku po shërohet nga një ndërhyrje kirurgjike për kancerin e prostatës. Deklarata e bërë me video ishte paraqitja e parë publike e zotit Austin, i cili dukej pak më i dobësuar. Sekretari Austin, 70 vjeç, qëndroi në spital për dy javë për shkak të komplikimeve pas operimit.

Të martën në Bruksel, Sekretari i Përgjithshëm i NATO-s Jens Stoltenberg njoftoi për një kontratë të re të përbashkët në vlerë prej 1.2 miliardë dollarësh për të blerë mbi 222,000 predha municioni 155 milimetërshe. Ky lloj predhash janë ndër municionet më të përdorur në këtë konflikt dhe kontrata do të shfrytëzohet për të furnizuar aleatët, të cilët ia kanë dhënë ndërkohë Kievit rezervat e tyre .

“Edhe pse nuk jemi në gjendje të ofrojmë aktualisht ndihmë sigurie, partnerët tonë do të vazhdojnë ta bëjnë këtë”, u tha gazetarëve të hënën zëvendës-zëdhënësja e Pengatonit, Sabrina Singh.

Ndërkohë që vëmendja është përqëndruar që nga tetori në konfliktin ndërmjet Izraelit dhe Hamasit, lufta e përgjakshme e Rusisë ndaj Ukrainës ka vazhduar.

Rusia të martën ka sulmuar dy qytetet më të mëdha të Ukrainës me mbi 40 raketa me rreze të gjatë veprimi, të nisura nga anijet dhe aeroplanët luftarakë, duke dëmtuar ndërtesa banimi dhe duke vrarë të paktën pesë persona. Sulmi ndodhi një ditë pasi Moska refuzoi idenë e një marrëveshje që mbështetet nga Kievi dhe aleatët perëndimorë për t’i dhënë fund luftës dy vjeçare.

Mbrojtja ajrore ukrainase arriti të ndalë të paktën 21 raketa, por sulmet lanë të paktën 20 persona të lënduar në katër lagje të Kievit.

Ukraina ka nevojë të madhe për sisteme të mbrojtjes ajrore dhe municion, deklaroi zëdhënësja Singh.

Pentagoni njoftoi ndihmën e fundit amerikane të sigurisë për Ukrainën më 27 dhjetor, në vlerë prej 250 milionë dollarësh, që përfshiu predha 155 mm, raketa kundër-ajrore “Stinger” dhe disa lloje tjera municioni, të cilat Shtetet e Bashkuara i morën nga rezervat ekzistuese amerikane.

Që atëherë Shtetet e Bashkuara nuk kanë qenë në gjendje të ofrojnë municion shtesë për shkak se paratë për të kompensuar rezervat janë shpenzuar dhe Kongresi ende nuk ka miratuar fonde të tjera.

Mbi 110 miliardë dollarë ndihmë për Ukrainën dhe Izraelin mbetet e bllokuar për shkak të mospajtimeve ndërmjet Kongresit dhe Shtëpisë së Bardhë rreth përparësive politike, përfshirë edhe për sigurimin e kufirit ndërmjet Shteteve të Bashkuara dhe Meksikës.

Shtetet e Bashkuara i kanë dhënë Ukrainës mbi 44.2 miliardë dollarë në formën e ndihmës së sigurisë që kur Rusia sulmoi Ukrainën në shkurt të vitit 2022. Rreth 23.6 miliardë dollarë janë armatim që është tërhequr nga rezervat ekzistuese ushtarake dhe gati 19 miliardë dollarë janë realizuar në formë të kontratave afatgjata ushtarake, për pajisje për të cilat duhen muaj për t’i porositur. Edhe pse fondet janë shpenzuar, disa nga armët e blera më herët do të vazhdojnë të mbërrijnë në Ukrainë. Një shumë prej 1.7 miliardë dollarësh është siguruar nga Departamenti amerikan i Shtetit në formën e financimit ushtarak për vendet e huaja.

TË FUNDIT

ME TE LEXUARA

LEXO MË SHUMË

dokumente pasaporta

Qytetarët e Shkupit mund të kontrollojnë online nëse pasaporta e tyre është gati

termet

Tërmet në afërsi të Ulqinit

Talat Xhaferi

Xhaferi në Samitin e Investimeve për Ballkanin Perëndimor të BERZH-it

Partite politike BDI vlen ash pde lp pdsh

Cilat janë emrat e kandidatëve për deputetë të partive në njësinë e dytë zgjedhore?

partite politike shqiptare VLEN BDI Populli PDSH ASH Sela PDE

Partitë gati emrat për deputetë në njësinë e parë zgjedhore, kush me kë?

kuvendi-i-rm-dasdasd-800x445

Partitë a do të heqin bërrylat për profesionistët dhe shoqërinë civile në listat për deputetë

spital-infermiere-mjeke shendetesi

Maqedoni/Mjekët punësohen nëpërmjet partisë ose kritereve tjera

Glauk Konjufca

Konjufca: Serbia është e gatshme t’i shtyjë planet e Putinit për destabilitet e luftë në rajonin tonë

supermarketet-800x445

Qytetarët blejnë vetëm produktet e nevojshme dhe kanë frikë nga një rritje e re çmimi

INFO

NA NDIQ