Këshilli Qendror i LSDM-së ka marrë vendim për formimin e grupit punues për vazhdimin e bisedimeve me VMRO-DPMNE-në dhe të gjitha partitë tjera parlamentare për operacionalizimin e hapave të ardhshëm konkret në lidhje me ndryshimet kushtetuese.
Ky vendim u miratua mbrëmë vonë në mbledhjen e thirrur nga kreu i kësaj partie, pas takimit me liderin e VMRO-DPMNE-së, Hristijan Mickoski.
Sipas njoftimit të LSDM-së, grupi punues do të udhëhiqet nga sekretari i përgjithshëm i LSDM-së Mile Zeçeviq Vardarski.
“Këshilli Qendror i jep mbështetje absolute kryetarit të LSDM-së Dimitar Kovaçevski dhe grupit punues që të vazhdojnë me përpjekjet për të siguruar një konsensus të gjerë për amendamentet kushtetuese, dhe në këtë mënyrë vazhdimi i rrugës evropiane të vendit” tha pas mbledhjes Bogdanka Kuzeska, zëdhënëse e LSDM-së.
Ajo informoi se KQ vlerësoi se ishte mirë që u vendos dialogu në një moment jashtëzakonisht të rëndësishëm të takimit me liderin e opozitës VMRO-DPMNE, si dhe se e mirëpresin hapin e parë që Mickoski e bëri me pranimin e amendamenteve kushtetuese.
