Shkëlzen Halimi
PESHA E MANIPULIMIT
Periudha e tranzicionit shqiptar (edhe në Maqedoni) do të karakterizohet vetëm me tendencën e ngjitjes dhe mbetjes në pushtet. Do të mungojë debati serioz dhe konstruktiv për politikën, kulturën, historinë, letërsinë, filozofinë, muzikën, religjionin, por edhe për shtylla tjera që plotësojnë mozaikun e identitetit shqiptar. Mbi shumë çështje do të sundojë heshtja dhe do mungojë zëri i duhur.
Mungon edhe analiza, interpretimi real i aktualitetit, i rrethanave, por mungojnë edhe qasjet sociologjike e psikologjike. Tashmë është e qartë se të gjitha shenjat tregojnë se shoqëria shqiptare është shndërruar në shoqëri kontradiktash. Në vorbullat e politikës shqiptare ndjehet vetëm manipulimi.
Mekanizmit mbrojtës i është nënshtruar edhe vetëdija e mbyllur. Ushtruesit e pushtetit, gënjeshtrës i japin atributin e të vërtetës, pavarësisht se opinioni në subkoshiencën e tij (nuk mund të protestojnë ata që i janë shitur pushtetit) e ka të qartë se bëhet fjalë për një mekanizëm të përsosur të grupit që i mban frerët e pushtetit….
Pesha e manipulimit të fabrikuar nga ana e grupit të pushtetshëm, asnjëherë nuk do të ndjehet si barrë që rëndon mbi popullin, madje kjo përmes ndërmarrjeve propaganduese, shumë herë është vlerësuar si angazhim i jashtëzakonshëm i grupit të pushtetshëm, i cili për t’u bindur se kjo vërtet jep rezultate, në vijat e para të frontit do t’i radhisë besnikët e manipuluar të partisë (ndryshe, vështirë është të mbahet në kondicion të përhershëm anëtarësia), të cilët kanë vetëm një detyrë: të premtojnë sa më shumë dhe premtimi i tyre të jetë sa më bindës…
