Burime partiake në LSDM pohojnë se partia po përballet me një konflikt të brendshëm partiak në të ardhmen e afërt, shkruan portali Expres.
Sipas burimeve të këtij portali, këto ditë dy grupe në LSDM po hapin jozyrtarisht shtabet e tyre për zgjedhjet e ardhshme presidenciale që duhet të mbahen në mars-prill të vitit të ardhshëm.
Një shtab joformal përbëhet nga njerëz të afërt dhe të koordinuar nga presidenti aktual i vendit Stevo Pendarovski, të cilët filluan të planifikojnë aktivitete në drejtim të rikandidimit.
Ndërsa siç shkruan Expres, grupi i dytë është i përbërë prej njerëzve që po përgatiten për fushatën presidenciale dhe që është i prirur nga ministri aktual i Punëve të Brendshme, Oliver Spasovski.
Synimi i tij parësor në muajt e ardhshëm është të krijojë një opinion brenda LSDM, por edhe brenda BDI-së se Pendarovski nuk mund të fitojë, por edhe nëse do të fitoj ai do t’i kthejë shpinën këtyre dy partive, nëse VMRO-DPMNE arrin të formojë Qeverinë e ardhshme.
Burimet që monitorojnë aktivitetet e dy grupeve pohojnë se sipas informacioneve nga dy selitë joformale, Pendarovski për momentin ka pasur mbështetjen e disa nga kryesuesit e LSDM-së si sekretari i përgjithshëm Mile Zeçeviq dhe disa diplomatë të huaj në Shkup.
Sipas të njëjtave burime, ministri Spasovski ka pasur mbështetjen e të ashtuquajturit lobi Kumanovës, në të cilin janë kryeministri Kovaçevski dhe disa zyrtarë të qeverisë si Artan Grubi, Nazim Bushi, zëvendëskryeministrja Grkovska për qeverisje të mirë dhe ministrja e mbrojtjes Sllavjanka Petrovska.
Për momentin, partia nuk dëshiron të fillojë zyrtarisht bisedimet për temën e kandidatit për president, sepse Pendarovskit i jepet mundësia për të përmirësuar vlerësimin e tij katastrofik, i cili sipas anketës së Market Vision ishte 0,3 për qind mbështetje nga qytetarët.
Në VMRO-DPMNE situata me kandidatët është shumë më e komplikuar, edhe pse partia ka përparësi serioze në sondazhe, por për momentin aty nuk mund të njihen kandidatët më seriozë për president.
Deri më tani, një duzinë persona kanë shprehur dëshirën e tyre direkte apo indirekte për të qenë kandidatë për kreun e shtetit nga partia më e madhe dhe më popullore, shkruan Expres. (INA)
