Ministrja e mbrojtjes e Maqedonisë së Veriut dhe zyrtarja e lartë e LSDM-së, Sllavjanka Petrovska theksoi se të dënuarit për rastin e Kumanovës, duhet që dënimet t’i vuajnë në vend dhe jo të ekstradohen në Kosovë.
Ajo këto komente i bëri në një konferencë për media në Athinë gjatë vizitës së saj në Greqi, përcjell INA.
E pyetur për skenarët e supozuar sipas të cilave të dënuarit e këtij rasti do të transferohen për të vuajtur dënimin në Kosovë, Petrovska u përgjigj:
“Mendoj se duhet të respektohet vendimi i gjykatave të vendit dhe të dënuarit ashtu siç janë dënuar në procedurë gjyqësore, duhet të vuajnë dënimin në burgjet e vendit tonë, aty pra ku është kryer vepra. Dhe nëse ka dyshime për kushtet apo rrethanat në të cilat ata janë duke e vuajtur dënimin, mendoj se është detyrë e secilit prej nesh që të punojmë për tejkalimin e sfidave apo problemeve të tilla që dalin, jo t’i anashkalojmë ato”, theksoi ministrja Petrovska.
Por, ndryshe nga ajo ka theksuar ministri i Drejtësisë i Maqedonisë së Veriut, Krenar Lloga. Ai në një intervistë për Radion Evropa e Lirë deklaroi se në rrjedhë është procesi i kompletimit të dokumentacionit për ekstradimin e Grupit të Kumanovës, duke nënvizuar se dinamika e realizmit të ekstradimit varet gatishmëria dhe shpejtësia e veprimit të gjykatave dhe institucioneve të tjera në këtë rast dhe të ministrisë së Punëve të Brendshme.
Për rastin e Lagjes së Trimave, u shqiptuan 746 vjet burgim për 33 pjesëtarët e grupit të Kumanovës, 7 prej të cilëve me burg të përjetshëm. Në ngjarjet e 9 dhe 10 majit të vitit 2015 në Lagjen e Trimave në Kumanovë mbetën të vrarë 10 pjesëtarët të grupit të armatosur dhe 8 pjesëtarë të policisë.(INA)
