“Nëse presidenti rus Vladimir Putin, për të cilin Gjykata Penale Ndërkombëtare (GJNP) në Hagë ka lëshuar një urdhër arresti, do të vinte në Kroaci, ai do të arrestohej në përputhje me procedurën e parashikuar me ligj”, tha sot në Bruksel kryeministri kroat Andrej Plenkoviç.
Kroacia aderoi në Statutin e Gjykatës Ndërkombëtare Penale dhe miratoi një ligj për bashkëpunimin me gjykatën.
“Ai ligj parashikon të gjitha procedurat në rast se ka urdhër arrest për një person dhe me sa di unë këtu nuk vlen imuniteti. Prandaj, procedura do të ishte pikërisht ashtu siç e parashikon ai ligj, dhe policia kroate dhe autoritetet kompetente me siguri do të reagonin”, tha Plenkoviç, duke iu përgjigjur pyetjes së një gazetari se si do të vepronte Kroacia në rast të vizitës së Putinit.
Plenkoviç vuri në dukje se një vizitë e tillë “gjithsesi nuk është realiste”. “Unë nuk besoj se ai do të shkojë në vendet që janë nënshkruese të Statutit të Romës kaq shpejt,” tha ai. Statuti i Romës është një traktat ndërkombëtar që krijoi Gjykatën Penale Ndërkombëtare. (INA)
