Vasill Jovanov i cili me veturë e goditi për vdekje Frosinën Kullakova në kalimin për këmbësorë në rrugën “Aradhet partizane” në janar të këtij viti, pranoi fajin për veprën e kryer në seancën e parë të gjykimit, përcjell TV21. I akuzuari i cili është në paraburgim, para gjykatës tha se e kupton veprën për të cilën ngarkohet dhe e pranoi fajin. ‘Së pari dua të shpreh ngushëllimet e mia më të thella familjes dhe kërkoj falje për atë që e bëra. Asnjëherë nuk kam mundur as të mendoj diçka të tillë’, tha ai.
Në sallën e gjykatës, të pranishëm ishin prindërit dhe motra e të ndjerës Frosina si dhe prindërit e Vasillit. Prokurori Aleksandar Markovski në fjalimin hyrës tha se në këtë rast nuk bëhet fjalë për aksident të rëndomtë trafiku, jo për shkak të famës mediatike, por për shkak të mënyrës se si ka ndodhur, në aspekt të lëshimeve të shumta të kryerësit dhe jetës së humbur në mënyrë tragjike të Frosinës. Gjykatësja Snezhana Markovska në fillimin e seancës së sotme njoftoi se mungojnë 6 dëshmitarë për shkak të ftesës së pakompletuar.
