Ministria e Punëve të Brendshme ka parashtruar kallëzim penal deri te Prokuroria ndaj policit me iniciale M.M., ndaj personit I.M. dhe ndaj një gruaje me iniciale R.M., përcjell TV21. Personat M.M. dhe I.M. dyshohet se janë furnizuar dhe kanë ruajtur në shtëpi ku jetonin në bashkëri një pushkë automatike, katër karikatorë dhe municion, gjegjësisht 125 plumba, ndërsa R.M. dyshohet se ka tentuar t’i fsheh të njëjtat gjatë bastisjes së policisë.
“M.M. ka përdorur municionin pa autorizim dhe e ka dhënë në një vend tjetër për ta përdorur nga i denoncuari i dytë, për ta përdorur si municion për automatikun pa leje që mbahej në shtëpi. I denoncuari i tretë, R.M., gjatë bastisjes në shtëpinë e tyre, i ka mbështjellë armët dhe municionin në një batanije dhe ka tentuar t’i çojë në një kat tjetër të shtëpisë, por është kapur dhe ndaluar nga punonjësit e Policisë. Në këtë mënyrë, ajo me vetëdije, pushkën automatike dhe municionin, si objekt nga vepra penale, ka tentuar t’i mbulojë ose fsheh, nga punonjësit e policisë që po kryenin bastisje”, thonë nga MPB duke shtuar se kanë kërkuar që polici të suspendohet nga puna deri në vendimin që pritet të marrë kontrolli i brendshëm pas ngritjes së procedurës disiplinore./tv21.tv
