Petar Bogojevski nga Koncepti Maqedonas u ka ofruar anëtarëve të grupit hebre Lev Tahor që të akomodohen në pronën e tij në Krushevë.
“E ftoj publikisht këtë grup hebrenjsh që të vendosen në pronën time në Krushevë, të gjejnë paqe dhe dinjitet, të kalojnë dimrin dhe të jenë të kujdesshëm përderisa kanë nevojë nga Maqedonia! Nuk kam asnjë komunikim me komunitetin hebre në Maqedoni, por mos ngurroni të më kontaktoni për t’ju ndihmuar! “, thotë Bogojevski.
Ai shton se ky grup persekutohet nga të gjithë vetëm sepse praktikojnë judaizmin themelor dhe bën thirrje që të ndaloj ky antisemitizm.
Grupi Lev Tahor u vendos për herë të fundit në fshatin Lakocerej të Ohrit, banorët e të cilit paralajmëruan protesta dhe kërcënuan të mos i linin fëmijët e tyre në shkollë.
Komuniteti hebre u ka bërë thirrje autoriteteve që të ndërmarrin veprimet e duhura kundër atyre që përhapin gjuhën e urrejtjes me rastin e qëndrimit të grupit fetar ortodoks Lev Tahor në vend, i cili, siç thuhet në deklaratë, në thelb është paqësor dhe nuk rrezikon.
Pjesëtarët e bashkësisë fetare hebreje Lev Tahor prej 17 ditësh janë në Maqedoni dhe po qëndrojnë në Kumanovë, Shkup dhe tani në Ohër. (INA)
