“Deri para dhjetë apo 15 vitesh këto toka bujqësore në Pollog ishin rreth tetëdhjetë për qind të mbjella, ndërkohë që tani, tridhjetë e mezi dyzet për qind e tyre rezultojnë të mbjella, të tjerat kanë mbetur në mëshirë të kohës. Bujqit ankohen se bujqësia më nuk ka leverdi, sepse shteti ka heq dorë prej saj”, raporton gazetari i Alsat, Bashkim Sulejmani.
Bekim Reshiti nga Reçica e Tetovës thotë se rritja e çmimeve të plehrave dhe ndihma nga Qeveria e cila më shumë i ngjan ndihmës sociale sesa ndihmës reale, bën që dita ditës bujqit të pakohen dhe të ikin nga bujqësia.
Edhe ai sikurse shumica e bujqve mendon ta këtë kulturë që në fakt është burim i ekzistencës së tij.
“Reçica e madhe dhe e vogla 90 për qind jemi marrë me bujqësi nuk kanë mbet tashmë as 20 për qind. Edhe ne që kemi mbetur e shtyjmë me zor por shpejtë do e lejmë edhe ne shkaku se të tregova, shumë para jepen në pranverë, e në vjeshtë vetëm sa i nxjerrim investimet, e malli na është harxhuar dhe nuk ka asgjë prej saj, nuk ka fitim”, tha Bekim Reshiti, bujk.
Uljen e numrit të bujqve, por edhe krizën që kanë të njëjtët, më së miri e vërejnë barnatoret bujqësore, sidomos në sezonin e pranverës.
“Momentalisht çmimet e plehrave janë në rritje dhe interesimi i bujqve është tejet i ulët. Tejet është vit i rëndë, aspak nuk janë të interesuar bujqit, si do ia bëjmë nuk e dimë. Nga viti i shkuar ka ndikuar edhe dëmi që u bë nga breshri. Ato bujq janë të dëmtuar tepër dhe se di si do ia bëjmë, sepse kanë ngel tek ne pa i paguar edhe ato materiale që i kanë marrë vitin e shkuar”, u shpreh Semir Bilalli, pronar i barnatores bujqësore.
Në Pollog, nga viti në vit, përqindja e atyre që mbjellin tokën po ulet thonë në Njësinë Rajonale të Ministrisë së bujqësisë, ndërsa më së shumti vërehet tek mbjellja e grurit.
Këtë vit shkaku i mos shlyerjes së borxhit që ka Qeveria ndaj bujqve pas dëmeve që u shkaktuan nga të reshurat, një numër i madh i bujqve as që kanë mbjellë tokat e tyre, sepse mjete për të blerë plehrat dhe farën nuk kanë, ndërsa Qeveria po vazhdon me zvarritjen e pagesave.
Qeveria aktuale ka në plan program stimulimin e bujqësisë me theks të veçantë në rajonin e Pollogut, por deri tani nuk është ndërmarrë asgjë. / Alsat.mk
