Franca nga nesër do të zbatojë ndalimin e duhanit në hapësirat publike ku qëndrojnë shpesh fëmijët. Kjo përfshin plazhet, parqet, stacionet e autobusëve si dhe ambientet përpara bibliotekave, pishinave dhe shkollave, njofton agjencia franceze e lajmeve AFP.
Dekreti është publikuar sot në gazetën zyrtare dhe thekson se qëllimi i masës është mbrojtja e fëmijëve nga tymi pasiv i duhanit. Shkelësit do të gjobiten deri në 135 euro.
Në dekret nuk përmenden cigaret elektronike, ndërsa duhani do të lejohet ende në tarracat e kafeneve.
Franca ka tashmë ndalim të duhanit në vende publike si vendet e punës, aeroportet, stacionet hekurudhore dhe nëpër këndet e lojërave për fëmijë.
Çdo vit rreth 75.000 persona humbin jetën në Francë për shkak të problemeve shëndetësore të lidhura me duhanin. Një sondazh i fundit tregoi se 62 për qind e francezëve e mbështesin ndalimin e duhanit në hapësirat publike.(INA)
