Universiteti “American College Shkup” ka zgjedhur rektoren e re. Pas zgjedhjeve të zhvilluara në të gjitha njësitë akademike të universitetit, në krye të institucionit është zgjedhur Prof. Dr. Venera Kërliu, e cila do ta marrë këtë detyrë kyçe nga 1 tetori 2025.
Me këtë zgjedhje, ky universitet paralajmëron një fazë të re zhvillimi, me fokus në arsimin cilësor, forcimin e bashkëpunimeve ndërkombëtare dhe avancimin e kapaciteteve kërkimore.
Në deklaratën e saj të parë pas zgjedhjes, Prof. Dr. Venera Kërliu u shpreh mirënjohëse për besimin e dhënë, duke theksuar se mandatin e ri e sheh si një mundësi të përbashkët për të ndërtuar më tej vlerat për të cilat njihet universiteti.
“Jam thellësisht mirënjohëse për besimin. Këtë mandat nuk e shoh vetëm si sukses personal, por si një mundësi të përbashkët për të vazhduar ndërtimin e një universiteti që kultivon dhe zhvillon hapjen, inovacionin dhe – mbi të gjitha – njerëzit,” u shpreh prof. Kërliu.
Rektorja e re nënvizoi se në periudhën në vijim, universiteti do të fokusohet në tre shtylla themelore: studentët dhe cilësinë e arsimit, zhvillimin e kapaciteteve akademike dhe kërkimore, si dhe përmirësimin e kulturës organizative.
Mandati i rektorit aktual, Prof. Dr. Marjan Bojaxhiev, do të përfundojë më 1 tetor 2025, ndërsa universiteti i shpreh mirënjohje për udhëheqjen dhe kontributin e tij ndër vite.
Në vitin kur ky universitet feston 20-vjetorin e themelimit, kjo tranzicion shënon një tregues të pjekurisë institucionale, me një vizion të qartë për të ardhmen. Mandati i ri rektorial simbolizon vazhdimësinë e vlerave, por edhe freskinë në qasje – me theks në kreativitet, etikë dhe kulturë bashkëpunuese. (INA)
