Prokurori publik ka kryer mbikëqyrje në vendin ku fëmija tetëvjeçar ishte sulmuar dhe kishte ndërruar jetë pas sulmit nga një qen i fqinjit në lagjen Pintia të Shkupit. Nga Prokuroria konfirmuan se po ndërmerren masa për hetimin e gjithë rastit.
“Prokurori publik ka kryer mbikëqyrje në vendin e ngjarjes. Është dhënë urdhër për obduksion dhe po ndërmerren veprime për hetimin e gjithë rastit”, informuan nga Prokuroria Publike.
Ministria e Punëve të Brendshme sot informoi se mbrëmë një fëmijë i mitur ka ndërruar jetë pasi ishte sulmuar nga qeni të cilin e ruante fqinji i tij.
“Nga SPQ ‘Shën Naumi i Ohrit’ më 11.04.2023 në orën 18:25 ishte denoncuar se te ata ishte sjellë një i mitur nga Shkupi, i cili sipas denoncimit u është nënshtruar lëndimeve si pasojë e sulmit nga qeni, pronë e fqinjit të tij N.G. Është njoftuar prokurori publik me urdhër të të cilit trupi është dorëzuar për obduksion dhe po ndërmerren masa për zbardhjen e rastit”, informuan nga MPB.
