Qeveria e Maqedonisë së Veriut pritet të formoj Agjenci apo Administratë për Mbajtjen e Regjistrimit të Detyrueshëm të Sigurimeve Shoqërore.
Ky propozim do të bëhet nga Ministria për Punë dhe Politikë Sociale, përmes një ligji të ri për Regjistrin e Sigurimeve të Detyrueshme Shoqërore, ku shënimet e të gjitha kontributeve do të mbahen në një vend – kontributi për sigurimin pensional dhe invalidor, kontributi për sigurim shëndetësor dhe kontributi për sigurim në rast të papunësisë, përcjell INA.
Ky institucion do të jetë një qendër e cila do të kryejë funksionin dhe punët e deritanishme të fondeve të shëndetësisë dhe atij pesional, por edhe të Ministrisë së Shëndetësisë, Ministrisë së Punës dhe Politikave Sociale si dhe Agjencisë për Punësim.
Administrata e angazhuar do të menaxhojë bazën e të dhënave, do të punojnë me aplikimet dhe çregjistrimet, regjistrimet dhe identifikimin e personave të siguruar, përpunimin e kontributeve të mbledhura, si dhe detyra të tjera.
Këtu do të regjistrohen të gjithë personat e siguruar dhe obliguesit. Në kuadër të ligjit të ri janë paraparë edhe gjoba nga 200 deri në 400 euro për individët dhe kompanitë nëse nuk respektojnë raportimin në kohë.(INA)