Si zakonisht, qeveria edhe sot pritet të mbajë mbledhjen e së martës. TV21 mëson se sot pritet të diskutohet për tenderin për ndërtimin e garazheve në kate në Qendrën Shkup, tender ky që i ka kaluar të gjitha procedurat por ende nuk është nënshkruar marrëveshja me kontraktorin, për shkak se së pari duhet të kalojë në Qeveri.
Jozyrtarisht, mësohet se qeveria mund ta anulojë këtë procedurë gjatë ditës së sotme, respektivisht t’i thotë “JO” kompanisë “Gjoka Construction” nga Shqipëria, me pronar Rrok Gjoka, e cila sipas ministrit të Shëndetësisë, Arben Taravari, për 6 muaj deri në një vit, me projekt ka parashikuar që t’i ndërtojë 600 vende të reja parkimi në Qendrën Klinike. Ministri Taravari tha se kompania do të menaxhojë me parkingun në Qendrën Klinike, për sa kohë që Qendra Klinike do të jetë në lokacionin aktual, që sipas ministrit, nuk do të jetë më shumë se 10 vjet.
“Nuk kemi nënshkruar, duhet të kalojë në qeveri, në qeveri ka filtra të caktuara që duhet parë të gjitha dokumentet. Se duhet parking në qendrën klinike, duhet, këtë askush nuk e konteston. Sa më shpejt, aq më mirë. Megjithatë për mua është shumë i rëndësishëm zëri i opinionit, është shumë i rëndësishëm për mua. Edhe pse disa thonë se 50 denarë janë shumë, unë mendoj se në shumicën e qyteteve, parkingu kushton 50 denarë”, u shpreh Arben Tarabari , ministër i Shëndetësisë.
Kryeministri Hristian Mickoski, i pyetur për këtë çështje, tha se kompania nuk do të zgjidhet nëse vërtetohen parregullsi për të.
“Kuptohet se një kompani që nuk ka kreditueshmëri, nuk ka besueshmëri, e as karakteristika teknike, nuk do të zgjidhet dhe këtu përfundon e gjitha”, u shpreh kryeministri i vendit, Hristijan Mickoski.
Ministri i shëndetësisë, Arben Taravari, dje shtoi se gjatë procedurës së tenderit për zgjedhjen e kompanisë, nuk ka asgjë të parregullt. Ai vlerëson se duhet të merret parasysh dhe se nëse anulohet tenderi kjo do të thotë se për procedurën e re do të duhet të kalojë së paku edhe një vit./tv21.tv
