VMRO-DPMNE sërish sot ka shënjestrur Qeverinë, duke e akuzuar lidhur me situatën e krijuar me ngrirjen e çmimeve. Sipas VMRO-DPMNE hipokrizia e Kovaçevskit ndaj qytetarëve është shembull klasik i gjithë qeverisjes së tij.
“Ai solli një masë që as qeveria nuk e respekton, ndërsa u paraqit si shpëtimtar, në një situatë ku lejoi që gjithçka të shtrenjtohej në Maqedoni. Kovaçevski në Qeveri e blen bukën për 30 deri në 100% më shtrenjtë se çmimi që e ka paraparë vetë, gjegjësisht për 450 gramë bukë të bardhë paguan 41,4 denarë, kurse për bukë të bardhë me afat të zgjatur paguan pak më pak se 80 denarë”, reagon VMRO-DPMNE.
Kjo parti thotë se para një viti ka apeluar se kjo situatë do të ndodhë, por Kovaçevski nuk ka dashur ta mbrojë standardin e qytetarëve me masa të duhura.
“Në vend të kësaj, Kovaçevski vendosi të rrisë çmimin e energjisë elektrike dhe lejoi që çmimet të rriten në qiell. Nëse Kovaçevski do të kujdesej për qytetarët, nuk do të lejonte inflacionin prej 20% në Maqedoni, të bjerë standardi i qytetarëve dhe në të njëjtën kohë do të rritej kostoja e jetesës. Prandaj aktrimi dhe hipokrizia e qeverisë është transparente”, theksojnë nga partia e Mickoskit. (INA)
