Qeveria e Maqedonisë së Veriut po analizon nëse frutat dhe perimet duhet të përfshihen në valën e ngrirjes së çmimeve të ushqimeve.
Nga Qeveria thonë se do të vazhdojnë të monitorojnë zhvillimet në tregun e brendshëm dhe atë botëror dhe se do të reagojnë në përputhje me rrethanat.
Në seancën e djeshme të Qeverisë u diskutua për ngrirjen e mundshme të çmimeve të pemëve dhe perimeve, ndërsa analizat e bëra nga Ministria e Bujqësisë, Pylltarisë dhe Ujërave duhet t’i dorëzohen Ministrisë së Ekonomisë dhe kabinetit të Kryeministrit.
Dje, në prag të konferencës për shtyp në Qeveri, Oda Ekonomike e Maqedonisë Veri-Perëndimore kërkoi që të ndalet ngrirja e çmimeve të produkteve ushqimore bazë dhe në vend të kësaj të gjenden mundësi të tjera për uljen e çmimeve për përdoruesit e fundit, si p.sh. uljen e taksave dhe TVSH-së dhe ndërhyrjen nëpërmjet rezervave shtetërore.
Ndërsa Oda Ekonomike e Maqedonisë tha se ngrirja e çmimeve nuk është zgjidhje tregu, dhe barrën e krizës, siç thanë ata, nuk duhet ta bartë vetëm një industri, por të bjerë në kurrizin e të gjithëve nga pak. . Ata propozuan që shteti të ofrojë ndihmë financiare të synuar në nivel të familjeve që do të blejnë bukë me çmime të ngrira.
Vendimi i parë për ngrirjen e çmimeve është marrë më 28 shkurt, kur çmimi i bukës së bardhë dhe gjysmë të bardhë është ngrirë në 33 denarë, më 16 mars Qeveria ka marrë vendim për ngrirjen e çmimeve të disa makaronave dhe produkteve të qumështit, ndërsa dje vendosi ngrirjen e çmimeve të vezëve dhe orizit.
