Ministria e Brendshme e Maqedonisë së Veriut gjatë ditës së djeshme (17.04.2023), ka kryer kontroll të intensifikuar në territorin e vendit për sanksionimin e automjeteve që lëvizin me shpejtësi më të madhe se shpejtësia e lejuar, me ç’rast janë sanksionuar 244 drejtues mjetesh.
Sipas raportit, 13 automjete kanë lëvizur me shpejtësi mbi 50 kilometra në orë më shumë se shpejtësia e lejuar dhe katër automjete me shpejtësi edhe më shumë se 70 kilometra në orë. Në të njëjtën kohë, 99 automjete kanë tejkaluar shpejtësinë në vendbanim, ndërsa 145 jashtë vendbanimit, përcjell INA.
Siç njoftoi policia, dy drejtues automjetesh lëviznin me shpejtësi të pabesueshme 222 dhe 246 kilometra në orë!
“Kontrollet e qarkullimit vijojnë edhe në ditët në vijim. Apelojmë tek të gjithë përdoruesit e rrugës që të respektojnë rregullat dhe rregulloret e qarkullimit rrugor dhe bashkërisht të kontribuojmë për rrugë më të sigurta”, njofton MPB.(INA)