Rama me maskën e tërmetit…

0

Nga Kastriot Islami
Tërmeti fatkeq e ka përkeqësuar gjendjen e përgjithshme të shqiptarëve. Gjendja ishte tejet e rëndë edhe para tërmetit nga qeverisja e Ramës, qeverisje oligarkike, kriminale, e papërgjegjshme dhe paaftë…por pas tërmetit kjo gjendje është rënduar aq sa për shumë familje është bërë e papërballueshme.

Pasiguria pas tërmetit është rritur edhe akoma më shumë dhe kjo ndjehet nga masivisht nga shqiptarët. Pasigurive të shumta nga keqqeverisja e Ramës, pas tërmetit i janë shtuar edhe pasiguria për jetën, pasiguria për banesën dhe pasiguria ekonomike e financiare për të mbijetuar…

Edhe ajo pak shpresë e optimizëm që filloi të lindte tek një pakicë e vogël është dëmtuar përsëri rëndë…Pas tërmetit pothuajse të gjithë duan të largohen ku të mundet, tanimë jo vetëm për të mbijetuar por edhe për të shpëtuar kokën…Për më tepër janë të lodhur e të çoroditur nga gënjeshtrat e mashtrimet e reja të Edi Ramës…

Edi Rama me një mjekër të shëmtuar, me injorancën që i lexohet në ballë e në të gjithë fytyrën, me guximin e një budallai dhe paturpësinë e një sharlatani, del çdo ditë që në mëngjes në të gjithë ekranet e televizioneve që mbajnë etiketën ERTV duke qëndruar gjatë gjithë ditës e lëshuar mbroçkulla e batuta tipike të një rrugaçi.

Edi Rama lëshon pa pushim mashtrime e gënjeshtra që as vetë nuk i beson dhe që neverisin të gjithë duke kërcënuar ndërkohë cilindo që thotë të vërtetën apo që tenton të bëjë transparencën e situatës…

Edi Rama jargavitet e lëpihet si hileqar e tinëzar, nga mëngjesi deri në darkë, për të bërë ortak e bërë pis PD, cilindo individ të ndershëm, opozitën e veçanërisht Lulzim Bashën ndërkohë që s’duron askënd afër vetes, nuk mban dot afër vetës asnjë edhe një specialist, madje deri as edhe Erjon Veliajn që e trajton si qen rrugësh….

***

Edi Rama prej datës 29 nëntor 2019 sorollatet rrugëve me maskën e tërmetit, si një sharlatan e gënjeshtar, tinëzar e hileqar, duke derdhur lot krokodili…

Edi Rama me maskën e tërmetit po tenton të fshehë krizën e rëndë ekonomike që kishte gllabëruar vendin dhe që tani pas tërmetit po e fundos më shpejtësi atë, për të dalë e thënë pas 2 muajsh që kriza erdhi nga tërmeti…

Edi Rama me maskën e tërmetit kërkon të fshehë pasigurinë dhe mungesën e shpresës së shqiptarëve që kishin arritur kulmin për shkak të keqqeverisjes së tij duke u përgatitur të deklarojë pas 2 muajve se pasigurinë dhe mungesën e shpresës jua solli tërmeti…

Edi Rama me maskën e tërmetit mendon se ka gjetur një hapësirë të re për të kontaktuar me shqiptarët e revoltuar dhe për ti mashtruar ata me gënjeshtrat e reja që po hedh në treg këto ditë përmes daljeve në ERTV, për të thënë pas 2 muajve që unë bëra gjithçka, madje më mirë e më shumë se në çdo venë tjetër të botës…

Edi Rama me maskën e tërmetit po tenton të fshehë manitë e marrëzitë e tij të vjetra për të goditur kundërshtarët e mediat kundërshtare…për të burgosur njerëzit e ndershëm që duan të solidarizohen me të dëmtuarit nga tërmeti, për të thënë pas 2 muajve se bëra të gjitha përpjekjet por më penguan kundërshtarët dhe media e portalet…

Edi Rama me maskën e tërmetit po tenton të hiqet si individi i vetëm me lidhje e mbështetje ndërkombëtare që mund të nxjerrë vendin nga kjo situatë, ndërkohë që të gjithë e njohin e shumë mirë dhe mesa duket shqiptarët do të duhet të lëngojnë edhe më shumë se vendin e drejton pikërisht ky personazh…

Edi Rama me maskën e tërmetit po i shtyn shqiptarët të largohen nga vendi duke krijuar hapësirën që pas 2 muajsh të deklarojë se numri i azilkërkuesve shqiptarë është rritur jo nga keqqeverisja e tij por nga tërmeti…

Edi Rama me maskën e tërmetit po tenton të shpëtojë oligarkët dhe kriminelët e ndërtimeve, duke i cilësuar si kontribuuesit më të mëdhenj për të tejkaluar pasojat e tërmetit apo shpëtimtarët e kësaj fatkeqësie, ndërkohë që refuzon të pezullojë financimin e PPP-ve.

Edi Rama me maskën e tërmetit kërkon të gjejë një hapësirë të re për vazhduar të mashtrojë e gënjejë shqiptarët e ndërkombëtarët, thjesht për interesin e pushtetit të tij personal.

***

Prandaj të gjithë njerëzit e ndershëm, profesionistët e ekspertët, media profesionale dhe opozita duhen të formojnë me urgjencë aleancën e solidaritetit me qytetarët e ndershëm, në shërbim të të gjithë atyre që janë dëmtuar nga tërmeti i 26 nëntorit por edhe nga tërmetet e keqqeverisjes së Ramës.

Aleanca e qytetarëve të ndershëm duhet të asistojë e ndihmojë qytetarët në çdo moment e me gjithçka munden.

Mbi të gjitha, pa frikë e me guxim, aleanca e qytetarëve të ndershëm dhe e medias së të vërtetës duhet të nxjerrin në dritë të diellit gjithçka ka ndodhur, pa pasur asnjë frikë nga kërcënimet e arroganca e një pushteti të kalbur.

Në këtë fazë të parë, kjo aleancë duhet të shpërfillë e braktisë, në çdo aspekt, Edi Ramën që me maskën e tërmetit po vazhdon tinëzisht të bëjë bashkëfajtor/ortakë në gjithçka ka bërë vetë më parë e vazhdon të bëjë edhe këto ditë, gjithkënd që nuk bën pjesë në qeverisjen e tij dështake, të formësuar e të mbështetur nga aleanca e qelbësirave.

Dhe vetëm pas pak kohe, kjo aleancë duhet me guxim të kërkojë hetim dhe nxjerrje të përgjegjësisë për keqqeverisjen e vendit nga Edi Rama, me lejet e ndërtimit të dhëna nga Edi Rama dhe banda e tij, që natyrisht është përgjegjësja kryesore e dimensionit katastrofik edhe e pasojave të tërmetit të fundit, duke kërkuar ndëshkim të ashpër për cilindo anëtar të kësaj kupolës së Rilindjes.

Nuk do të mund të ketë rindërtim dhe të ardhme pa ndëshkimin e kësaj bande që ka shkaktuar të gjithë këto pasoja, veçanërisht duke vrarë aftësinë e meritën në favor të ngritjes së Modelit të së Keqes që është kthyer nga Edi Rama në model suksesi.