Replikat mes kreut të qeverisë shqiptare, Edi Rama dhe deputetit britanik Nigel Farage mbi emigrantët shqiptarë në Angli vijojnë në distancë.
Pasi Farage pranoi ftesën e Ramës për të ardhur në Shqipëri dhe për të diskutuar nga afër çështjen e emigracionit dhe të burgosjes së shqiptarëve në Britani, kreu i qeverisë i është përgjigjur mëngjesin e sotëm dhe i kërkon të caktojnë datën.
https://www.instagram.com/nigel_farage/?utm_source=ig_embed&ig_rid=8660de66-e15e-4561-9d1b-df273040518b
Rama gjithashtu ka kritikuar deklaratën e Farage, i cili tha se “ndoshta është një kriminel në tre apo katër shqiptarë”.
Kritika e Ramës vjen pasi Farage u shpreh i bindur për shifrat, të cilat tha se i kishte verifikuar dy herë.
“Nga “një kriminel për çdo pesëdhjetë shqiptarë”, deklarata jote ka degjeneruar në: “Ndoshta është një në tre apo ndoshta një në katër, nuk e di” Vërtet? Nuk e di? Dhe kjo pasi the se i kishe “verifikuar dy herë” shifrat?”, shkruan Rama.
Kreu i qeverisë i vë përpara shifrat e Ambasadës së Shqipërisë në Mbretërinë e Bashkuar dhe thekson se shqiptarët që jetojnë dhe punojnë në Britaninë e Madhe janë njerëz që shërbejnë me dinjitet në Britani dhe në profesione të respektuara.
Në fund Rama i kërkon të pranojë se ka gabuar dhe ka fyer dhe baltosur një komunitet të tërë njerëzish që i shërbejnë Britanisë si të ishte atdheu i tyre.
Reagimi i Edi Ramës
Nigel, Nigel, Nigel…
Nga “një kriminel për çdo pesëdhjetë shqiptarë”, deklarata jote ka degjeneruar në:
“Ndoshta është një në tre apo ndoshta një në katër, nuk e di”
Vërtet? Nuk e di?
Dhe kjo pasi the se i kishe “verifikuar dy herë” shifrat?
Unë tashmë të drejtova te burimi yt — artikulli i The Telegraph, edhe pse i paqëndrueshëm. Por ti duket se këmbëngul në gabim.
Më lejo, pra, të të ndihmoj me pak më shumë qartësi.
Sipas të dhënave të Ambasadës së Shqipërisë në Mbretërinë e Bashkuar, një institucion që merret me njerëz të vërtetë, jo me tinguj propagande të Brexit-it, numri i shqiptarëve në Britani nuk është 53,000 siç thotë fillimisht The Telegraph.
