Synimi ynë ishte rrëzimi i Qeverisë së Zaevit sepse kemi një program kundër korrupsionit.
Por betejën e fitoi pushteti pasi ai rrëmbeu një deputet dhe sot jemi këtu në një seancë për të zgjedhur qeverinë e re që është vetëm vazhdimësi e asaj të mëparshme, tha deputeti i Aleancës për Shqiptarët Surija Rashidi.
Ai tha se tashmë është e kaluar dhe vlerësoi se në programin e mandatarit Dimitar Kovaçevski ka shumë premtime që me vite mbesin vetëm në letër.
Në seancën për zgjedhjen e qeverisë së re, deputeti i Aleancës për Shqiptarët tha se është turp të përmendet autostrada për në Kosovë, e cila me vite, tha ai, po ndërtohet dhe është vetëm disa kilometra. Ai po ashtu deklaroi se po flitet për Korridorin 8, i cili prej vitesh është përfshirë në programe të ndryshme, por nuk është realizuar.
Sipas tij, beteja e partive në pushtet është aq e ashpër sepse ka një arsye të madhe – të mbrohen nga zbulimi i të gjitha krimeve dhe korrupsionit.
Rashidi theksoi se sidomos BDI-ja e politizon administratën publike si në nivel shtetëror ashtu edhe në atë lokal.
Deputeti vlerësoi se presioni ndaj atyre që nuk janë anëtarë dhe përkrahës të BDI-së është i madh. (INA)
