Pas aktgjykimit fillestar më 2017, edhe instancat tjera të drejtësisë në Shkup, Apeli dhe Supremja kanë hedhur poshtë mundësinë e një rigjykimi për të dënuarit për rastin e Kumanovës.
Për një dekadë, zëri është ngritur në shumë qarke për një gjyq ndërkombëtar, por ka mbetur veç si një jehonë. Pavarësisht kësaj, mbrojtja ka pasur kërkesë një hetim ndërkombëtar, për të zbardhur gjithë të vërtetën.
Avokati i 12 të akuzuarve, Naser Raufi, ka treguar se kanë dorëzuar ankesë në Gjykatën Ndërkombëtare të të Drejtave të Njeriut në Strasburg.
“Presim vendimin e Strasburgut dhe mendoj se mund të ketë, janë shanset e mëdha për rigjykim të rastit duke ditë se asnjë provë s’është pranuar”, ka thënë Raufi.
Avokati nga Kosova, Ardian Bajraktari, ka thënë për MAT se në raste të tilla si i Grupit të Kumanovës, armik është koha.
“Provat mund të zbehen, të shkatërrohen dhe dëshmitarët vdesin e harrohen e të gjitha këto mund të kenë ndikim në një proces të mirëfilltë për të hedhur dritë për çfarëdo pretendimi”, ka vazhduar Bajraktari.
