Gazetari dhe botuesi i gazetës Koha, Arben Ratkoceri, ka reaguar ashpër ndaj ndryshimeve të miratuara dje në Ligjin për Inspektoratin e Gjuhës, duke i cilësuar si një goditje në palcë ndaj Ligjit për përdorimin e gjuhës shqipe.
Sipas Ratkocerit, kjo çështje përfaqëson një hap prapa në respektimin e të drejtave gjuhësore të shqiptarëve, ndërkohë që BDI, e cila për vite me radhë e ka quajtur “vijë të kuqe” çdo tentativë për cenimin e gjuhës shqipe, e kaloi këtë ndryshim me lehtësi dhe pa kundërshtim serioz.
“Është interesante – shkruan ai – se si një çështje kaq e ndjeshme dhe me rëndësi kombëtare, u trajtua si një çështje rutinë nga BDI dhe partnerët e saj qeveritarë, pa asnjë debat publik apo qëndrim të qartë politik.”
Ratkoceri paralajmëron se heshtja përballë ndryshimeve që dobësojnë zbatimin e gjuhës shqipe është e rrezikshme, dhe i bën thirrje opinionit që të mos e relativizojë këtë zhvillim. (INA)
