Pedagogu Petraq Milo që ishte rrahur nga policia malazeze e ka mohuar që nuk e ka respektuar radhën, siç kanë raportuar autoritet malazeze.
“Po të shikoni videon me kujdes, makina jonë është në radhë habitem se si nuk është evidentuar ky fakt”, tha ai pwr Euronews Albania.
Ndryshe Policia e Malit të Zi ka arrestuar të mërkurën Nikolla Boljeviç dhe Dragan Shqekiç – dy zyrtarët policorë të cilët dyshohen se kanë keqtrajtuar Milon më 15 janar në pikën kufitare Sukobin – Muriçan.
Ata janë arrestuar me urdhër të Prokurorisë së Ulqinit, nën dyshimin se kanë kryer veprën penale – keqtrajtim, pra përdorim të tepruar të forcës – konfirmoi të mërkurën Drejtoria e Policisë, transmeton mediumi malazez “Vijesti”.
“Me urdhër të Prokurorit të Shtetit në Prokurorinë Themelore të Ulqinit janë privuar nga liria dy zyrtarë të Drejtorisë së Policisë nën dyshimin se kanë kryer veprën penale të keqtrajtimit”, thuhet në njoftim.
“Veprën penale të lartcekur, punonjësit e policisë dyshohet se e kanë kryer më datë 15 janar 2023, në vendkalimin e përbashkët kufitar Sukobin-Muriçan, duke përdorur forcë të tepruar gjatë ushtrimit të kompetencave të tyre zyrtare ndaj shtetasve të huaj”.
Një video prej 34 sekondash është publikuar në rrjetet sociale ku shihet një polic malazez teksa ushtron dhunë ndaj profesorit universitar, Petraq Milo, njëherit kryetar i Komisionit për Ekonominë dhe Financat në Partinë e Lirisë.
Kryeministri Malit të Zi, Dritan Abazoviç, tha se videot, në të cilat shihen disa policë të Malit të Zi duke keqtrajtuar një shtetas shqiptar në kufi me Shqipërinë, i ka parë që nga data 15 janar, prej kur edhe “janë ndërmarrë masa”.
