Regjistrimi i veturave në Evropë bie për më shumë se 25%

Regjistrimi i veturave në Evropë ka rënë për më shumë se 25% në muajin shtator të këtij viti, për shkak të mungesës së furnizimit të automjeteve si pasojë e mungesës së vazhdueshme të gjysmëpërçuesve, treguan të dhënat e industrisë të premten.

Sipas njoftimit, regjistrimet e veturave të reja për pasagjer, kanë rënë për 25,2% në Bashkimin Evropian, në Britani të Madhe dhe në shtetet që janë pjesë e Asociacionit Evropian për Tregti të Lirë (EFTA), në krahasim me vitin e kaluar.

Këto janë të dhënat e prezantuara së fundmi nga Shoqata Evropiane e Prodhuesve të Automjeteve (ACEA).

Numri i makinave të shitura ishte 972,723 në tregjet e Bashkimit Evropian, Britanisë së Madhe dhe EFTA-s, që sipas AECA-s, është më e ulëta në muaj që nga viti 1995.

Grupi i industrisë ACEA beson se shkaku kryesor është mungesa e gjysmëpërçuesve, e cila ka çuar në pezullimin e prodhimit në fabrikat e automobilave.

Rënia e shitjeve në shtator e ka shtyrë industrinë nën rezultatet katastrofike të vitit të kaluar si pasojë e bllokimit nga COVID-19, i cili mbylli shumë tregtarë.