Rektori i UT-së ngushëllon familjen Ramadani: “Humbëm një student shembullor!”

Rektori i Universitetit të Tetovës, prof.dr.Vullnet Ameti ka përcjell një mesazh ngushëllimi familjes Ramadani nga Kumanova për humbjen e djalit të tyre Erdan Ramadani, në tragjedinë që ndodhi gjashtë ditë më parë në ujrat e lumit Vardar në afërsi të Zhelinës së Tetovës.

“Po përjetojmë dhimbje të madhe sikurse familja Ramadani për humbjen e jetës së djalit të tyre, Erdan Ramadanit, studentit tonë shembullor. Që nga data 27 shtator kur edhe mësuam lajmin e kobshëm për aksidentin fatal në rrjedhën e lumit Vardar, ne drejtuesit e Universitetit të Tetovës, Fakulteti Filozofik dhe të gjithë studentët jemi solidarizuar me familjen Ramadani nga Kumanova.

Sot e përgjithmonë do ta kujtojmë për edukatën, përkushtimin për arsim, altruizmin për të mirën e përgjithshme dhe angazhimin e tij në aktivitete dhe veprimtarinë arsimore-shkencore të Universitetit të Tetovës. Shprehim ngushëllimet më të ndjera për familjen e respektuar Ramadani, miqtë, kolegët e tij studentë dhe mbarë opinionin publik. U prehtë në paqe!”, ka shkruar rektori Ameti. (INA)